Daśabhūmīśvaro nāma mahāyānasūtraratnarājastotram
Technical Details
daśabhūmīśvaro nāma mahāyānasūtraratnarājastotram
śamadamaniratānāṃ śāntadāntāśayānāṃ
khagapathasadṛśānāmantarīkṣasamānām|
khilamalavidhutanāṃ mārgajñānasthitānāṃ
śṛṇuta varaviśeṣaṃ bodhisattvāṃśca śreṣṭhān|| 1||
kuśalasatasahasraṃ saṃcitaṃ kalpakoṭayā
subuddhaśatasahasraṃ pūjayitvā gṛhītam|
pratyekajinavarānvai pūjayitvā tvanantān
sakalajagahitāya jāyate bodhicittam|| 2||
uta tapatapitānāṃ kṣāntipāraṃgatānāṃ
hṛtaśritacaritānāṃ puṇyajñānodgatānām|
vipulagatimatīnāṃ puṇyajñānāśayānāṃ
daśabalasamatulyaṃ jāyate bodhicittam|| 3||
pramuditasumatīnāṃ dānadharme ratānāṃ
sakalajagahitārthaṃ nityamevodyatānām|
jinaguṇaniratānāṃ sattvarakṣāvratānāṃ
tribhuvanahitakartṛ jāyate bodhicittam|| 4||
akuśalaviratānāṃ śuddhamārge sthitānāṃ
vrataniyamaratānāṃ śāntasaumyendriyāṇām|
jinaśaraṇagatānāṃ bodhicaryāśayānāṃ
tribhuvanahitasādhyaṃ jāyate bodhicittam|| 5||
anugatakuśalānāṃ kṣāntisvārasyabhājāṃ
viditaguṇarasānāṃ tyaktamānotsavānām|
nihitaśubhamatīnāṃ dānasaumyāśayānāṃ
sakalahitavidhānaṃ jāyate bodhicittam|| 6||
pracalati śubhakārye dhīravīryāḥ sahāyā
nikhilajanahitārthaṃ prodyate mānasiṃhaḥ|
avirataguṇasādhyā nirjitakleśasaṃdhā
jhaṭiti manasi teṣāṃ jāyate bodhicittam|| 7||
susamavahitacittā dhvastamohāndhakārā
vigalitamadamānā tyaktasaṃkliṣṭamārgāḥ|
samasukhaniratā ye tyaktasaṃsārasaṃgā
jhaṭiti manasi teṣāṃ jāyate bodhicittam|| 8||
vimalakhasamacittā jñānavijñānavijñā
nihatanamucimārā vāntakleśābhimānāḥ|
jinapadaśaraṇasthā labdhatattvārthakāye
sapadi manasi teṣāṃ jāyate bodhicittam|| 9||
tribhuvanaśivasādhyopāyavijñānadhīrāḥ
karibalaparihāropāyavidṛddhimantaḥ|
sugataguṇasamīhā ye ca puṇyānurāgā
sapadi manasi teṣāṃ jāyate bodhicittam|| 10||
tribhuvanahitakāmā bodhisaṃbhārapūrtyai
praṇihitamanasā ye duṣkare'pi caranti|
avirataśubhakarma prodyatāṃ bodhisattvāḥ
sapadi manasi teṣāṃ jāyate bodhicittam|| 11||
daśabalaguṇakāmā bodhicaryānuraktā
vijitakaribalaughāstyaktamānānuṣaṅgāḥ|
anugataśubhamārgā labdhadharmārthakāmā
jhaṭiti manasi teṣāṃ jāyate bodhicittam|| 12||
iti gaṇitaguṇāṃśā bodhicaryāścarantu
jinapadapraṇidhānā satsamṛddhiṃ labhantu|
tribhuvanapariśuddhā bodhicittaṃ labhantu
triśaraṇapariśuddhā bodhisattvā bhavantu|| 13||
daśapāramitāḥ pūrya daśabhūmīśvaro bhavet|
bhūyo'pi kathyate hyetacchṛṇutaivaṃ samāsataḥ|| 14||
bodhicittaṃ yadāsādya saṃpradānaṃ karoti yaḥ|
tadā pramuditāṃ prāpto jambūdvīpeśvaro bhavet|| 15||
tatrasthaḥ pālayet sattvān yathecchapratipādanaiḥ|
svayaṃ dāne pratiṣṭhitvā parāṃścāpi niyojayet|| 16||
sarvān bodhau pratiṣṭhāpya saṃpūrṇadānapāragaḥ|
etatkarmānubhāvena saṃvaraṃ samupācaret|| 17||
sampacchīlaṃ samādhāya saṃvaraṃ kuśalī bhavet|
tataḥ sa vimalāṃ prāptaścāturdvīpeśvaro bhavet|| 18||
tatrasthaḥ pālayet sattvānakuśalaṃ nivārayet|
svayaṃ śīle pratiṣṭhitvā parāṃścāpi niyojayet|| 19||
sarvān bodhau pratiṣṭhāpya sampūrṇakuśalī bhavet|
etaddharmavipākena kṣāntivratamupāśrayet|| 20||
samyak kṣāntivrataṃ dhṛtvā kṣāntibhṛt kuśalī bhavet|
tataḥ prābhākarīṃ prāptastrayastriṃśādhipo bhavet|| 21||
tatrasthaḥ pālayet satvān kleśamārganivāraṇaiḥ|
svayaṃ kṣāntivrate sthitvā parāṃścāpi niyojayet|| 22||
sattvān bodhau pratiṣṭhāpya śāntipāraṃgato bhavet|
etatpuṇyavipākena vīryabalamupāśrayet|| 23||
samyag vīryaṃ samādhāya vīryabhṛtkuśalī bhavet|
tataścārciṣmatīṃ prāpya sudhāmādhipatirbhavet|| 24||
tatrasthaḥ pālayan sarvān kudṛṣṭīḥ saṃnivārayet|
samyagdṛṣṭau pratiṣṭhāya bodhayitvā prayatnataḥ|| 25||
svayaṃ dhyānavrate sthitvā parāṃścāpi niyojayet|
sarvān bodhau pratiṣṭhāpya dhyānapāraṃgato bhavet|| 26||
etatpuṇyavipākena dhyānapāraṃ samārabhet|
sarvakleśān vinirjitya samādhisusthito bhavet|| 27||
samyagdhyānaṃ samādhāya samādhikuśalī bhavet|
tataḥ sudurjayāṃ prāptaḥ sa tuṣitādhipo bhavet|| 28||
tatrasthaḥ pālayetsattvāṃstīrthyamārganivāraṇaiḥ|
sattvadharmaṃ pratiṣṭhāpya bodhayitvā prayatnataḥ|| 29||
svayaṃ dhyānavrate sthitvā parāṃścāpi niyojayet|
sarvān bodhau pratiṣṭhāpya dhyānapāraṃgato bhavet|| 30||
etatpuṇyavipākena prajñāvratamupāśrayet|
sarvānmārān vinirjitya prajñābhijñāsamṛddhimān|| 31||
samyak prajñāṃ samādhāya svābhijñākuśalī bhavet|
tataścābhimukhīṃ prāptaḥ sunirmitādhipo bhavet|| 32||
tatrasthaḥ pālayet sattvānabhimānanivāraṇaiḥ|
śūnyatāṃ supratiṣṭhāpya bodhayitvā prayatnataḥ|| 33||
svayaṃ prajñāvrate sthitvā parāṃścāpi niyojayet|
sarvān bodhau pratiṣṭhāpya prajñāpāraṃgato bhavet|| 34||
etatpuṇyavipākaiśca samupāyavrataṃ caret|
sarvaduṣṭān vinirjitya saddharmakuśalī sudhīḥ|| 35||
samupāyavidhānena sattvān bodhau niyojayet|
tato dūraṅgamāṃ prāpto vaśavartīśvaro bhavet|| 36||
tatrasthaḥ pālayetsattvānabhisamayabodhanaiḥ|
bodhisattvaniyāmeṣu pratiṣṭhāya prabodhayet|| 37||
tatropāye svayaṃ sthitvā parāṃścāpi niyojayet|
sarvān bodhau pratiṣṭhāpya upāyapārago bhavet|| 38||
etatpuṇyānubhāvaśca supraṇidhīnupāśrayet|
mithyādṛṣṭiṃ vinirjitya samyagdṛṣṭiḥ kṛto budhaiḥ|| 39||
supratiṣṭhitacittena samyagbodhau pratiṣṭhitaḥ|
tataścāpyacalāṃ prāpto buddhayā sāhasrikādhipaḥ|| 40||
tatrasthaḥ pālayetsattvān tripānaṃ saṃpibet śanaiḥ|
lokadhātau parijñāne pratiṣṭhāpya prabodhayet|| 41||
supraṇidhau svayaṃ sthitvā parāṃścāpi niyojayen|
sarvān bodhau pratiṣṭhāpya prāṇiṣu pārago bhavet|| 42||
etatpuṇyānusāraiśca balavratamupāśrayet|
sarvaduṣṭān vinirjitya sambodhikṛtaniścayaḥ|| 43||
samyagyatnasamutsāhaiḥ sarvatīrthyān vinirjayet|
tataḥ sādhumatīṃ prāpto mahābrahmā bhavet kṛtī|| 44||
tatrasthaḥ pālayan sattvān buddhayānopadeśanaiḥ|
sattvāsamaparijñāne samyagbodhau prabodhayet|| 45||
svayaṃ bale pratiṣṭhitvā parāṃścāpi niyojayet|
sarvān bodhau pratiṣṭhāpya balapāraṃgato bhavet|| 46||
etatpuṇyavipākaiśca jñānavratamupāśrayet|
caturmārān vinirjitya bodhisattvaguṇākaraḥ|| 47||
samyagjñānaṃ samādhāya saddharmakuśalo bhavet|
dharmameghāṃ tataḥ prāpto maheśvaro bhavet kṛtī|| 48||
tatrasthaḥ pālayan sarvān sarvākārānubodhanaiḥ|
sarvākāravare jñāne pratiṣṭhāpya prabodhayet|| 49||
svayaṃ jñāne pratiṣṭhitvā parāṃścāpi niyojayet|
sarvān bodhau pratiṣṭhāpya jñānapāraṃgato bhavet|| 50||
etatpuṇyānubhāvaiśca daśabhūmīśvaro jinaḥ|
sarvākāraguṇādhāraḥ sarvajño dharmalābhavit|| 51||
iti matvā bhuvabhiśca sambuddhapadalabdhaye|
daśapāramitārūpe caritavyaṃ samāhitaiḥ|| 52||
tathā bodhiṃ śivāṃ prāpya caturmārān vinirjayet|
sarvān bodhau pratiṣṭhāpya nirvṛtiṃ samavāpsyatha|| 53||
etajjñātvā paricchāyāṃ caradhvaṃ bodhiśāsane|
nirvidhnaṃ bodhimāsādya labhadhvaṃ saugataṃ padam|| 54||
etāstā khalvāha jinaputro daśabodhisattvabhūmayaḥ samāsato nirdiṣṭāḥ sarvākāravaropetāḥ sarvajñānānugatā draṣṭavyāḥ| tasyāṃ velāyāmayaṃ trisāhasralokadhātuṣaḍvikāraṃ prākampata vividhāni ca puṇyāni viyatto nyapatan| divyamānuṣakāṇi ca bhūtāni saṃpravāditānyabhūvan, anumodanāṃśagena ca yāvadakaniṣṭhabhuvanaṃ vijñaptamabhūt||
śrībodhisattvacaryāprasthānād daśabhūmīśvaro nāma
mahāyānasūtraratnarājastotraṃ samāptam|